En jungen Mann

                                                                                     von Hartmut Meinke


Ik gah af un an gern mal op den Wochenmarkt in Wilster.

Annerletzt weer ik dor un stell mi bi den Gemüsestand an. Ik wull Wittkohl köpen. Wi hebbt ja dat meiste an grönen Kraam in uns Gaarn, aber Wittkohl hebbt wi nich, den mööt wi köpen.

An den Stand stunnen veele Lüüd. Ik stell mi also darto, so en richtige Schlang is dat allerdings nich. Man steiht dor, en blang den annern un snackt na links un rechts. Nu keem aber dat Problem: wokeen is an de Reeg?

 

De Verkööpersch froog en Fru, wat se wohl hebben wull. Aber de Fru wies in miene Richtung und sä: „ Der junge Mann war vor mir da“.

Ik keek mi üm, aber dor weer keenen blang mi.

 

Se harr mi meent!

 

Dat kunn doch wohl ni angohn! Ik meen, ik bün ja noch nich hunnert, aber „junger Mann“, dat weer doch wohl en beten wat överdreven.

Ik keek ehr an, wat se sik villicht över mi lustig maken wull - aber ne, dat kunn ik nich erkennen.

 

Na, ik heff mien’n Kohl köfft un bün na Huus föhrt. Aber mit de Geschichte weer ik noch ni torecht. Also dat erste weer: rin in de Baadstuuv un in’n Spegel kieken. Na ja, dat Gesicht kenn ik ja, kiekt mi siet endlose Tieden jedeen Morgen an.

Aber in düssen Moment funn ik, dat ik doch recht fründlich un angenehm utseeg. Denn af in den Flur, hen to den groten Spegel. En „Bodyscan“, as man hüüt seggt, vun baben na ünnen.

 

Dat Ergebnis: insgesamt recht ördentlich. De Haar en beten wat to lang un man kunn ok en lütten Buukansatz erkennen. Na, ik keek ni ganz genau hen. An den lütten Buuk kann man ja so gau nix ännern. Aber mit de Haar, dor is wat to maken.

 

Wenn man as Mann in mien Öller is, gifft dat bloots noch wenige Mööglichkeiten mit de Frisur:

Hest du noch rieklig Haar op dien’n Kopp, kannst du na’n Frisör hen un di en normalen Haarschnitt verpassen laten.

Sünd de Haar op dien’n Kopp al en „gewisse Minderheit“ kannst du de lang wassen laten un denn vun links na rechts oder vun rechts na links över dien’n Kopp kämmen. Du muttst bloots oppassen, dat du nich in den Wind kaamst. Denn blaast de din Haarpracht op en Siet un dat süht meist recht wat snaaksch ut.

Wenn du bloots noch recht wenig Haar op dien’n Kopp hest, man seggt ok: „beginnende Glatze“, denn schullst du de ganz kort schnieden.

 

Bi mi is dat so un ik heff mi dorüm al vör Jahren en lütte Haarsniedemaschin köfft. As ik nu vör den groten Spegel stunn heff ik beslaten: Is mal wedder Tiet to’n Haarsnieden.

Her mit de Maschin, Haar un Bart torüchsneden op 9 Millimeter - Mann, wat seeg dat fein ut.

 

Mien lütte Fru keem na Huus un meen:

„Du siehst jetzt viel jünger aus, schön“.

 

Dat hett mi natürli mächtig freut.

 

Nächste Week will ik wedder to Markt - mal sehn, wat mi denn dor bemöten warrt.              

  Newsletter abonnieren

eMail Adresse
Name
Ort
anmeldenabmelden


Joletter.de-Newsletter

Besucher:

X-Stat.de

Letzte Änderung: 22.02.17
Foto shz, Dorfputz