E 605

                                                                          Hartmut Meinke 2018

As lütten Jung heff ik mi öfters mol en poor Penn verdeent. Bi uns‘ Navers, weern jo all’ns Buern, heff ik Steen sammelt, de Köh to’n Melken holt oder in de Heuoorn holpen.

Mit dat Geld bün ik denn forts to’n Höker in’t Dörp lopen. 

Dor heff ik mi Salmis oder bunte Bontjes köfft. För en Groschen geev dat en lütte Papiertüüt vull. Dat weer en dree-eckige Tüüt mit opdruckte sülverne Steerns.

De Kopmannsfru lang mit en lütte Schüffel in dat grote Bontjeglas rin. Männigmol müss se düchtig stökern, wiel de Bontjes tosamenbackt weern. 

Hett mi nich stöört, dat Slickertüch hett liekers fein smeckt. 

Hüüt sünd de Bontjes, Lakritzen, Kaugummi un alle anneren söten Saken in Plastiktüten packt. Un dor backt nix mehr. Damols weern bloots lütte Steerns op de Tüüt druckt, hüüt steht dor en lange List mit all’ns, wat in de Bontjes bin is. 

Jüst so en Tüüt leeg bi uns op’n Disch. Wi harrn uns dat kommodig maakt un wulln en Krimi in’t Fernsehen ankieken. Bi den Film güng dat natürli üm Mord un Dootslag, so as jümmers in düsse Geschichten. Besünners weer aver, dat

de Mord mit Gift maakt weer, de Kommissare harrn dat opletzt rutfunnen. 

Na, de Film weer toend un wi wullen to’n Afschluss noch en poor Bontjes geneten, sotoseggen as Entspannung. 

Ik nehm de Tüüt in Hand un wull ehr oprieten. Vörher keek

ik gau noch na de opdruckte List. Opeens verfehr ik mi:

dor stunn doch warraftig E 605 un noch männig mehr Nummern mit E. Dat kunn doch wohl nich angohn: en vun de slimmsten Giften in unse Bontjes? Ik kunn erinnern, dat

E 605 fröher as Rottengift Verwendung harr. In Düütschland is dat al lang verboden. 

As ik dat mien lütte Fru vertell, keek se nipp un nau op de Tüüt un meen: 

„Schau mal, da ist eine kleine Falte im Plastik über der 6, nimm doch mal die andere Brille!“ 

Se maak dat Plastik glatt un sä: „Guck, es handelt sich nämlich um E 905. Der Stoff wird als Überzug für Süßigkeiten verwendet, damit sie nicht aneinander kleben.“ 

Ik nehm de annere Brill un keek akkerat hen. Se harr recht. 

Na, dor weer ik aver doch beruhigt un wi hebbt uns de Bontjes smecken laten.