Karpengriepen in Achter-Neendörp

                                                                                         Hartmut Meinke 2017

Karpen in Achter-Neendörp? De gifft dat hier doch gorni much man glöven. Dat stimmt ok, egentlich leevt se hier nich, man uns‘ Naver har damols en Idee. Dat is üm un bi dörtig Johr her, dor leet he op sien Land en Diek utbaggern. Water geev dat noog vun de depen Quellen, de wi hier överall hebbt.

As de Diek vullopen weer, hett uns‘ Naver lütte Karpenkinner köfft un rinsett. „Tööv man af, in’t neegste Johr sünd se groot un wi köönt ehr rutholen“, meen he. Över’t Johr hett he düchtig Foder dor rinsmeten. In’n Harvst, en Johr later, keem denn de Meldung an uns un annere Navers: „Morgen wüllt wi Karpen griepen“.

Wi hebbt uns bannig freut. Aver wi müssen faststellen, dat de Organisation vun dat „Event“ nich ganz enfach weer:

Eerstmol müss dat Water ut den Diek rut. Dat Water löppt aver nich enfach af in uns‘ siedet Land. De Füerwehr kunn denn hölpen.

För de weer dat Water pumpen en Aart Övung. De Kameraden rücken an, ehr Motorpump worr anstellt un spütt dat Water rut in de Wettern. Wi stunn’n blangbi un warmen uns ‘n beten op mit Kaffee un en Sluck ut de Buddel.

Miteens fung de Pump an to stottern: se harr keen Sprit mehr.

Un dat an en Sünndagmorgen! Na, in Wilster kreegen wi Benzin

un se kunnen wieder pumpen. To’n Glück geev dat an den Dag

keen echten Füerwehrinsatz.

Dat Water weer nu weg, in‘n Mudd zappeln de Fisch. Aver woans kregen ehr nu rut? Wi kunn’n dor jo nich ringahn, wi weern ganz gau in Richt to’n Eerdmiddelpunkt versackt.

Uns‘ Naver harr en feine Idee: he holl grote Leddern ran. De worrn nun vun Över to Över utleggt un weern sodennig en Aart Brüch. Dorop kunn man balanceern un de Karpen griepen. Dat güng en Tiet lang goot, aver denn kreeg uns‘ Naver dat Övergewicht un full lingelangs in den Schiet. He hangel sik an de Ledder t’rüch an’t Över.

He seeg ut as en…. na, dat will ik hier nu nich neeger beschrieven. Aver wi, all de Tokiekers un Mitmaakers, hebbt uns verlööft, en beten wat to grienen.

De Karpen-Oorn weer goot. All hebbt se wat afkregen. Un later geev dat en Karpenfest bi uns‘ Navers, Karpen kokt un Karpen rökert.

In’t Johr dorna geev dat en anner Methood.

Wi hebbt en Sleepnet bastelt.

Dat trocken wi dörch den Diek. Dat Water müss nich afpumpt warrn un keenen full in den Schiet. Dat weer aver nich so opregend un lustig as in’t Johr dorvör.