Veeruntwintig Stünnen

Hartmut Meinke 2015

„Nu hest du jo ganz veel Tiet“, meen mien Fründ as he hört harr, dat ik mit 65 in Rente gohn bün.

„Nu kannst du allens ganz sutje angohn laten:

Utschlopen, lang fröhstücken, in’t Blatt lesen, spazeeren gohn, mit dien Fohrrad fohrn, al morgens inköpen un op’n Markt gohn, Navers to’n Fröhschoppen besöken, Rosen schnieden in dien‘n Gaarn, an‘n Obend mit dien lütte Fru schnacken, Wien drinken, lesen, fernsehen…. .“

He hett Erfohrung dormit, he is al länger Rentner.

Op de ene Siet harr he recht: Man kann sik allens fein inrichten.

Op de anner Siet:

De Gedanken över „Nu hest du jo ganz veel Tiet“ leeten mi nich los.

Wi all hebbt 24 Stünnen an en Dag Tiet.

Renters un Pensionäre seggen ja oft: „Ik heff gorkeen Tiet, ik mutt hüüt düt un dat erledigen.“ Dat stimmt, för den Dag.

Un för den Rest vun’t Leven stimmt leider ok:

Man hett nich mehr soveel Tiet.

En Blick torüch:

Solang du en lütt Kind büst, löppt de Tiet heel langsom.

Wat hett dat duert, bit de Ferientiet keem!

Un de Ferien weern denn jümmers unendlig lang. Wiehnachten weer ok ganz wiet weg. De Sommers, so is dat meistens in de Erinnerung, weern hitt, schöön un lang. In’n Winter keem jümmers ganz veel Frost un Schnee.

As „Teenager“ hest du darop luert, achteihn to warrn.

Achteihn: Föhrerschien maken, en Fründin oder Fründ hebben, to’n Danzen gohn, dat Leven geneten – de Tokunft weer rosig!

Dat Leven güng wieder: Na de School keemen Utbildung, Arbeit, Hochtiet, Huus, Auto, Kinner, Urlaub un anneres mehr.

Un nu, as Rentner un Pensionär:

Du hest 24 Stünnen an den Dag, dat is bleven.

Den gröttsten Del vun‘t Leven hett man hatt, so oder so.

In’t Öller kümmt dorto ok noch dat Geföhl, dat de Tiet jümmers gauer lopen deiht: Al wedder Wiehnachten, al wedder Ostern un Pingsten!

De Sommer al wedder vörbi.

Wo sünd de Johren bleven - un wat blifft nu över?

Un wat warrt mit den Rest?

Bloots veele Erinnerungen, Billers op Papier un Billers in’n Kopp?

Ne, veel mehr: freuen wi uns över jeden Dag, an den wi noch hier sünd.