Paula

                                                                                        Hartmut Meinke 2014

Wat is se doch sööt un nüdlich. Süht jümmers so schier un gesund ut,

löppt lustig dörch de Gegend, springt hierhen un dorhen, klattert de Bööm op un dal...

Ach so, dat schull ik villicht doch'n beten genauer verklorn: ik meen nich mien lütte Fru, dütmal snack ik vun uns Katt. Paula heet se. Egentlig schull se ja en annern Namen hebben. Worüm se nu Paula heten deiht, will ik vertelln:

En lütten Kater weer dootbleven. He weer uns damols tolopen, ganz krank,

an't Enn weer he nich mehr to retten. Wi wulln nu gern en niege Katt hebben und frogen an bi en Fründin, wat se en „in't Angebot" harr.

Jo, dat harr se wohl, schull dat en Kater oder en Katt ween? Na, wi hebbt - bit op den letzten - gode Erfahrungen maakt mit Katers. Wenn de to rechte Tiet opereert warrn, sünd se fründlich un blievt häuslich. Wi fohrn hen un kreegen en lütten Kater mit.

Dat Kind mutt jo en Namen hebben: „Pelle", den Namen harrn wi uns utsöcht. So en lütt Deert mutt man jo jümmers wedder mit sien' Namen ansnacken - denn hört he darop. Dat güng allens ganz fein. Pelle weer en richtig lustigen Kammeraat, he speel mit allerlei Kraam un he höör op uns.

Denn worr dat Tiet för de erste Impfung. Katten mööt jo unbedingt impft warrn gegen allerlei Krankheiten. Un man mutt ok över de nödigen Operationen mit den Tierdokter snacken. Ik also mit Pelle hen to unsen fründlichen Tierdokter. He keek Pelle gründli an un sä: „Das ist kein Kater, das ist eine weibliche Katze!"

Dunnerslag!

Also en Deern, keen Jung. Ik harr jo, ehrlig seggt, vörher al mal twüschen sien Achterbeen keken. Un ik harr Billers ut Internet holt. Aver ik kunn dat sodennig nich so recht inordnen. Bün jo keen Tierdokter. Aver de harr mi beruhigt as he meen: „Es ist nicht einfach, bei sehr jungen Katzen das Geschlecht zu bestimmen."

Nu weer dat also rut. En lütte Kattendeern. Den „Impfpass für Katzen" müss ännert warrn.

Aver, wat för en Namen? Na, wi hebbt uns „Paula" utsöcht un dor rinschreven. Beten later keem denn de nödige Operation. Wi wullen jo nich, dat Paula uns veele lütte Paulas oder Pelles bescheert.

Un nu:

Wat is se doch sööt un nüdlich. Süht jümmers so schier un gesund ut,

löppt lustig dörch de Gegend, springt hierhen un dorhen, klattert de Bööm op un dal un - fangt sik af un an mal en Muus.