Internet

                                                                                       Hartmut Meinke 2013

Ik harr faststellt,
dat en Marder in uns' Schüün togang weer. De Resten vun en Fasan un lütte
Schiethopens weern de Bevis. As wi denn op'n Böhn in't Huus ok noch Spuren
funn'n weer klor: wi mööt mal wedder wat ünnernehmen! Fröher harrn wi Lampen opstellt un en Radio. Mit en lütte automatische Klock worrn Lichter un Musik in- und utschalt. Hett ok klappt, aber dat duer ümmer lang.
Dütmal wull ik em anners to Liev: ik wull en „elektronischen Marderschreck" un darto noch en „Marder-Abwehr-Spray" köpen.

Bi en Elektronik-Versand in't Internet heff ik de Bestellung opgeven. Dat weer an den 26. Dezember in't letzte Jahr. Bestätigung keem per Mail, betahlt harr ik online. In dree Daag schull de Lieferung kamen.

Keem aber nich.

Du kannst ja „online" verfolgen, wo sik dat Paket befinden deiht. Dat weer, en Week later, jümmers noch an de erste Station vun veer!

Na, ik heff noch'n paar Daag töövt, denn schreev ik, an den 4. Januar in't niege Jahr, en Mail an de Firma. En fründliche Antwoort keem torüch:

ik schull mi man noch'n beten wat gedulden, villicht weer den en oder annern Artikel jüst nich op Lager. Ik geduld' mi denn ok en paar Daag.

As ik denn wedder „Sendungsverfolgung" anklicken dee, leeg min Paket jümmers noch in de erste Station.

Ik schreev wedder en Mail an de Firma, an'n 11. Januar - dat dor wat nich stimmen kunn, se schulln doch mal bi de Post nafragen. Anners wull ik mien Geld torüch!

Düt Mal keem de Antwoort erst fief Daag later: jo, se wulln dat maken, aber so en Vörgang kunn bet to veer Weeken duern.

De Marder leep buten un op'n Böhn rüm un lach' sik natürlich halv doot.

Denn keem en Breef vun de Post, üm und bi an'n 20. Januar. Ik schull nu op en Formular genau angeven, wat för en Paket ik vermissen dee, wat dor bin sien schull un so wieder.

Also goot, heff ik utfüllt un torüch schickt. Porto müss ik nich betahln, se wulln wohl en beten goot Wedder maken. Dat weer ok nödig, denn bi lütten weer ik doch 'n beten wat grantig:

De Tiet gung in't Land, Februar keem.

Wedder en elektronischen Breef vun de Firma: dat Paket weer nich mehr optofinden, wenn ik de Artikels noch hebben wull, schull ik nochmal bestellen.

Heff ik maakt, an'n 8. Februar.

Tein Daag later, an'n 18. Februar keem dat Paket. Det ganze Geschichte hett knapp 8 Weeken duert.

Internet-Express Bestellung!!

Un de Marder?

Jo, de harr sik nu wohl ganz dootlacht - de leeg en Week bevör dat PakeT keem vör uns Kökendöör - verstorben.

Entweder dootlacht wegen mien Internet-Geschichte oder ümkamen bi en Striet mit en Konkurrenten - villicht wegen en Marderin... ?

De Experten, de wi fraagt harrn, wüssen dat ok ni soo genau.

Ik heff nu den elektronischen Kraam un dat Spray in't Angebot. Kann man bi mi bestellen. Aber dat duert denn en paar Weeken..... .