De Lappen

                                                                           Hartmut Meinke 2013

                                                                            

 

„Se wüllt mi nu den Lappen afnehmen“, sä mien Fründ.

 

Wi seten tosamen in uns’ Stuuv un weern an’t Snacken över düt und dat.

 

Ik froog verwunnert: „Hebbt se di mit’n besopen Kopp erwischt? Oder büst du bi lütten to old to’n Autofohrn?“

 

Wi gaht ja beide stracks op de söbentig to, dor mutt man doch schon mal an sowat denken.

 

„Ne, ik heff höört un leest, dat man de olen Föhrerschiens nu afgeven mutt“, meen he.

 

„Dat is ja wat anners, as wenn de ‚afnahmen’ warrt! Wi mööt ehr ümtuschen, de olen Dinger, de passt nich mehr in de moderne Tiet,“ sä ik.

 

Un denn weer de Tietpunkt kaamen, sik an ole Tieden to erinnern.

Wi drunken en lütten Sluck un keeken denn en knapp halv Johrhunnert torüch:

 

Wat weer dat dor doch enfach, de „Lizenz“ to kriegen. Ik weet dat noch genau: veer Fohrstünnen heff ik hatt. Mien Vadder meen damols: „Du kannst auf dem Schulhof üben. Hinten am Wald geht es auch. Und im Dänemark-Urlaub üben wir am Strand.“ De ganze Geschichte weer sodennig mit knapp 300.- Mark erledigt. Mien ölleren Broder harr bloots een Fohrstünn. He keem noch günstiger darbi wech.

De Föhrerschien-Klassen weern damols översichtlich: Klasse 1 bit Klasse 5. Hüüt gifft dat de Klassen A bit L. Nich so recht översichtlich.

 

Na de Fohrstünn keem „Prüfung in Theorie und Praxis“. Weer nich schwoor.

 

Toletzt geev dat „den Lappen“:

 

En grieset Faltblatt. Mit Passbild, behördliche Vermerke, Stempel un Ünnerschriften. Mien Föhrerschien!

Mit achteihn Jahrn stunn mi nu de KfZ-Welt open.

 

Den doren Schien schleep ik nu al siet fiefunveertig Jahren mit mi rüm.

Un mien Fründ deiht dat sölbige mit sien’n Schien. Wi kregen ehr rut un bekeken de Billers. Mannomann, wat för nette, fründliche, hübsche Jungs!

Un de olen Stempels un Ünnerschriften. Allns noch fein to lesen.

Wi hebbt unse Schiens, de olen Lappens, so richtig leef.

 

Darop hebbt wi noch en nahmen un beslaten: Wi geeft den Schien nich af, niemals, nich in den Rest vun uns Leven.

 

So’n olle Plastikkort - dat is ja de Ersatz för uns wunnerbar Dokument - wüllt wi nich hebben. Dat langt uns al mit de Kort vun de Bank, du kannst ja dien Bargeld bloots noch den Automaten afsnacken. Dat gifft noch mehr Korten: Krankenversekerung, Autoversekerung un veele annere.  

 

Wi hebbt ja noch Tiet bit 2033 - kunn angahn, dat sik dat vun sülvst erledigen warrt.

 

Wi gaht ja stracks op de söbentig to!

 

  Newsletter abonnieren

eMail Adresse
Name
Ort
anmeldenabmelden


Joletter.de-Newsletter

Besucher:

X-Stat.de

Letzte Änderung: 11.10.17
Struktur