Dat Schild an’t Auto

                                                                                        Hartmut Meinke 2013

Dat geiht üm dat niege Schild an’t Auto.

Nu schüllt ja de KFZ-Kennteken - villicht - wedder so warrn as fröher, vör de Kreisreform un dat all.. .

„IZ“ weer jümmers IZ un blifft ok IZ, aber ik bün ja in de Gegend vun Eckernföör groot worrn. Damols harrn wi „Eck“ as Auto-Kennteken. Dat erste Auto vun mien Öllern, en grise VW-Standard, harr dat Kennteken Eck-P-789. As ik mien erstet Auto köfft harr, weer dor ok noch en Eck-Kennteken an. Denn keem ik na Wilster, un dat Auto heet aff sofort: „IZ“.

Hüüt kann man ja, wenn man sik en nieget Auto köfft, en Kennteken utsöken. Besünners good hebbt dat de ut Heid un Pinnbarg, Kiel oder Segebarg.

De Heider köönt sik to’n Bispill HEI-NI utsöken. HEI-DI oder HEI-KE, wenn de Fru oder Fründin so heeten deiht. De Pinnbarger köönt PI-KS utsöken, oder dat „K“ ok weglaten. De Kieler nehmt eenfach KI-EL, oder KI-EK. Ganz interessant is dat ja bi de Segebarger: SE-KT kann man utsöken oder sogar KT mit X uttuschen.

Mit „IZ“ warrt sowat natürli nix. Dor mööt wi uns wat överleggen. Villicht geiht dat ja mit NEUENDORF-SACHSENBANDE? Dücht mi aber nu: dat is en beten wat to lang. HINTER-NEUENDORF, VORDER-NEUENDORF un all de annern passen ok enfach nich op een Schild.

Also mööt mehr Schilders ran an’t Auto!

En mit „normal-IZ“, en mit NEUENDORF-SACHSENBANDE, en mit den Ortsdeel un dat veerte mit den egen Namen. Wenn schon - denn schon.

So maakt wi dat - en lüttes Problem gifft dat aber liekers noch:

Wi mööt uns ganz groote Autos köpen, darmit de Schilders ok Platz hebben.