Wi sünd alle Verbrekers

                                                 

                                                                                    
Hartmut Meinke 2012

  

Ja ja, dat stimmt: wi Achter-Neendörpers sünd alle Verbrekers. Un nich bloots wi, ok Krützflethers, Överflethers un Achterhörners sünd mit vun de Partie.

Dat hangt mit de Renovierung vun de Kreisstraat K 17 in’t Johr 2010 tosamen.


Bloots ganz kort to’n Erinnern: In’n April hebbt se damals darmit anfungen und ferdig weern se denn in’n Juli. En lange Tiet för so’n paar Kilometer Straat.

Aber dat weer so as to’n Bispill in en Grootköök:

en is tostännig för de Planung, en för den Inkoop, en för de Vörsupp, en för de Kantüffeln, en för dat Fleesch, en för dat Gemüse, en för de Soß, en för dat Dessert un so wieder. 

 

De erste weer hier tostännig, de ole Straat mit so en Aart gewaltigen Grubber um un um to wöhlen. De nächste schull dat en beten glatt maken. Hett he aber nich. Denn kemen de mit de Zement-Granitsteen. Veel later, as plant. Un an’t Enn de grote Maschin, de den ganzen Kraam wedder hochnehm un mit noch mehr Zement un Bitumen un wat weet ik vermengen un wedder opbringen dee. Noch later keemen denn de „Verschleißschichten“ rop.

Un ganz toletzt de Lüüd för de Banketten. Jedes Maal en anner Firma tostännig - ik segg ja: as in de Grootköök.

Na, nich ganz: in de Köök hanteert se mit Messers un Gabels, mit Töllers un Schöteln.

Op den Weg weern se alle togang mit richtig gewaltige Maschins, Baggers, Grubbers un mit riesige Lastwaagens. Man mutt sik ja wunnern, dat keen vun de in’t Moor afsopen is.

 

Un wi alle harrn würklich Probleme: wochenlang sünd wi över „Mondlandschaften“ föhrt, dicke Teerplacken, massenhaft Stuff, Schiet un Dreck, deepe Fahrrünnen un so wieder.

Fröhmorgens keeken wi jümmers rut: is wat to sehn oder to höörn? Denn hebbt wi telefoneert mit Nabers: „sünd se bi ju in de Gang, sühst du en vun de gewaltigen Lastwaagens, höörst du wat?“

Un dat Ganze güng över mehr as dree Monate. De Autos weern sowat von schietig und vull Stuff. De Granitsteen knallen vun ünnen an de Kist. Den en oder anner föhr sik fast un harr sodennig Schaaden an sien Auto.

 

Hett dat een vun’t Amt oder de Kreisverwaltung interessert?

Nee, ganz in’t Gegendel:

Wi alle harr’n nämlich överhaupt nix to melden. Un dat is so to verklaaren:

Schilders harrn se ja opstellt: „Durchfahrt verboten“.

Aber een Schild: „Anlieger frei“ hebbt se nich darbi hatt.

Dat hett meent: wi dörfen dor gornich fohren! Wi hebbt den Knüppeldamm mehr as dree Monate illegal mit uns’ Autos befohrt. Weer ja egaal, wat wi nu jeden Dag to Arbeid müssen, de Kinner to School kamen schulln, de ganz Lütten to’n Kinnergarden, un ok maal düt un dat intokööpen weer.

Ne, wi harrn dor gornich fohren dörft.

 

Un deswegen sünd wi alle Verbrekers, wi hebbt de Anwiesungen vun dat Kreisverkehrsamt enfach ignoriert. Jo, wi hebbt hier illegal leevt.

Wi sünd enfach wieder to Arbeid föhrt, hebbt uns’ Kinner to School bröcht, de ganz Lütten in den Kindergarden, wi hebbt inköfft un Nabers besöcht.

 

Ja ja, de Neendörpers hebbt all ehr’n egen Kopp, aber wenn’t op an kümmt, hold se tosamen und maakt dat, wat vernünftig is. Un dat is richtig goot so.

 

Aber de Geschicht geiht noch en beten wieder:

 

De Straat is ja recht glatt un schier warrn, wi köönt wedder fein fohr’n un uns ok maal Besöök inladen - ohn’ dat de in den Schiet to Malör kaamt.

Un de ganze Weg liggt - um un bi - veertig Zentimeter höger as vörher - sodennig hebbt wi noch mehr Översicht över dat, wat hier passeert.

Wenn du mit Fohrrad fohren deihst, kannst du sogar över den Mais hinweg kieken.

 

Aber nu ward dar ja fohrt as op den Nürburg-Ring.

Private Lüüd mit ehr opflitzt Autos, Motorradfahrers mit ehr gewaltige Mopeds un Buern mit ehr Mega-Treckers.

All fohr’n se, as wenn se darmit wat gewinnen kunn’. Ohn’ Rücksicht op Kinner, groote Lüüd, Urlaubers, Tieren un Hüüs.

 

Dar mööt sik de Achter-Neendörpers, Krützflethers, Överflethers un Achterhörners doch maal wat överleggen, wenn’t sien mutt: beten illegal!

 

Wi sünd ja sowieso al Verbrekers, dar kummt dat op en beten mehr oder weniger ok nich mehr an.

 

  Newsletter abonnieren

eMail Adresse
Name
Ort
anmeldenabmelden


Joletter.de-Newsletter

Besucher:

X-Stat.de

Letzte Änderung: 11.10.17
Struktur