„Schiethuus“, „Tante Meier“ oder „Kläranlage“?


 
                                                                                    
Hartmut Meinke 2012


In mien nächste Leven warr ik Kläranlaagen-Deckel-Op-un-Dicht-Maker!!

 
„Nu is he woll mall worrn“, warrn ji denken. Aber laat mi dat eerstmal vertellen:

 

Dat is recht ’n paar Johr her, dat se uns ut Kiel opdrückt harr’n, nu richtig gode un vernünftige Kläranlaagen intorichten. Över de Angelegenheit hebbt wi bit denn garni so genau nadacht.

 

As wi uns Huus in Achter-Neendörp in de 70-Johrn köfft harrn, weer dor ja al en Anlaag. Dree Kammern, de erste för dat Dicke, de tweete för das Mitteldicke und de drütte för dat Flüssige. Hett allens fein lopen. Leermaken müss’ man de alle paar Johr. Denn fungen se an, de Dinger jedes Johr uttopumpen. Dat weer schlecht för de Biologie in de dree Kammern - aber dat interesser keen en. Gesetz is Gesetz un Geld stinkt nich - aber jedenfalls stunk dat jümmers, wenn se de Kraam utpumpt harrn.

 

Fröher, in ole Tieden, weer dat ja - in de Hinsicht - enfacher op den Hoff.

Dat Schiethuus weer in oder blang den Kohstall, dar rüük dat sowieso na Mist un de Minsch mit sien lütten Bidrag dorto full nich wieder op. Un dor weer dat ja ok warm, in so’n Stall.

Ik persönlich bin nich op en Hoff grootworrn. Bi uns weer dat „Örtchen“ buten,

in en Aart Schuppen, ungemütlich un kold. Wi wahnten nämlig in’t Schoolhuus, un dor weer keen Kohstall.

In de Stadt harr’n se ja de „Goldammels“ - wat daran „Gold“ weer, kann sik jedereen sölber överleggen.

De Tieden hebbt sik ännert. Kanalisation geef dat denn in de Stadt und de ersten Klärgruben op’t Land.

Un de hebbt fein funktioneert. Blots de Afpumperee jedes Johr - heff ik ja al seggt: dat stunk achteran un hett Geld kost.

Na ja, wi hebbt uns denn as örndliche Staatsbörgers de nigen Gesetze un Verordnungen füügt un so en düre Anlaag bauen laaten. Geev ja ok en lütten Toschuss vun de Gemeen, genauer: ut Kiel. Aber wi hebbt nu hohe Folgekosten: De Apparat - wi nömt em „Klärchen“ bruukt Strom för spezielle Pumpen. Un en Firma mutt dreemal in’t Jahr kamen un alle Funktionen pröven.

 

Un nu erst kummt de egentliche, de richtige Geschichte:

 

Irgendwann is dor ja noog „Material“ bin un dat mutt utpumpt warrn.

De Service-Firma stellt dat fast un meld dat an’t Amt. „Leerung im Quartal“ stunn in den Servicebericht. Hett ja noch’n beten Tiet, dach ik, dat Quartal harr jüst anfungen.

 

Aber op uns’ Amt sünd se ja fix un geeft den Opdrag sofort wieder an de Schiet-Afpump-Firma. Un de stunn den nächsten Dag op uns’ Hoff und pump de Anlaag af. Meent ji, de harrn sik anmeld? Nee, mööt se nich, de maakt nemlig en „Sonderabfuhr“.

 

De Hauptmacker bölk’ mi an: „Regelabfuhr gibt’s nicht mehr“.

De töövt nich, bit dor dree oder veer Anlagen to leeren sünd un sodennig dat för de Minschen villicht en beten wat billiger warrn kunn. Un den Begriff „Quartal“ kennt se anschienend ok nich.

 

Fröher weern se nett un hebbt ok jümmers en Trinkgeld vun uns kregen, sotoseggen en „Schietzulage“. Aber düt Mal nich, de weern mi to unfründlich. Achteran heff ik ja spitz kregen, dat se an den Dag noch mehr Anlagen in’t Dörp leerpumpt hebbt. All’ns „Sonderabfuhr“?!

 

Un denn keem de Reken vun’t Amt.

163,34 Euro.

Mit en Posten, den ik nich verstunn: „Grundgebühr“, 127,78 Euro.

Dor heff ik denn bi’t Amt nafraagt un kreeg Bescheed över den Posten.

 

Alleen 30,42 Euro för dat Kläranlaagen-Deckel-Op-und-Dicht-Maken.

Aber - dat duert doch man bloots en Minut, gifft also en Stundenlohn vun 1825,20 Euro. Dunnerslag, heff ik dacht, so verdeent man Geld.

 

Ik bün en flietigen Beamten ween, heff mi as Lehrer mit de Kinner befaat,

de besünders veel Hölp bruken. Dat weer nie nich licht, aber ik bün vernünftig betahlt worrn.

Un denn lees ik in de Mail vun’t Amt: 30,42 Euro för dat Kläranlaagen-Deckel-Op-und-Dicht-Maken. Dat is eerst en vernünftige Entlohnung, oder?

 

Un dor heff ik beslaten:

 

In mien nächste Leven warr ik Kläranlaagen-Deckel-Op-un-Dicht-Maker!

Denn heff ik ok noog Geld, um en Schiethuus, na ja, seggt wi nu mal:

en „Tante Meier“ in mien Garden tu buun.

So en as fröher - mit en lütt Hart in de Dör. Aber nu mit Licht un Heizung.

Nich so kold un ungemütlich as fröher - tohuus.

 

Un denn kaamt mi de Afzockers vun de Schiet-Afpump-Firma nich mehr op’n Hoff, dor köönt ji ju op verlaten.

 

In „Klärchen“ is denn nämlig nix mehr bin!!

  Newsletter abonnieren

eMail Adresse
Name
Ort
anmeldenabmelden


Joletter.de-Newsletter

Besucher:

X-Stat.de

Letzte Änderung: 11.10.17
Struktur